အင်းတော်ကြီးဒေသသဘာဝလယ်ယာသီးနှံစိုက်ပျိုးရေးအသင်း၏ ရည်မှန်းချက်မှာ သဘာဝစိုက်ပျိုးနည်းအလေ့ အထများကျင့်သုံးကာ အင်းတော်ကြီးဒေသ၏ အသက်မွေးဝမ်းကျောင်းလုပ်ငန်းများ မြှင့်တင်ရန်နှင့် သဘာဝပတ်ဝန်းကျင်ကို ထိန်းသိမ်းရန်ဖြစ်သည်။ အထူးသဖြင့် တောင်သူလယ်သမားများအချင်းချင်း စိုက်ပျိုးရေးဗဟုသုတ ဖလှယ်ရန်နှင့် ပုံမှန်သင်တန်းများပြုလုပ်ရန် အဓိကရည်ရွယ်သည်။ ထို့ပြင် အင်းတော်ကြီးဒေသရှိ တောင်သူများအားလုံး အသင်း၏အဖွဲ့ဝင်ဖြစ်လာရေးနှင့် သဘာဝနည်းဖြင့်စိုက်ပျိုးထားသော ဆန်နှင့် အခြားထွက်ကုန်ပစ္စည်းများ တန်ဖိုးမြှင့်တင်ရေးသည် အသင်း၏အဓိကရည်ရွယ်ချက်ဖြစ်သည်။
